Türkmenistan bilen Şweýsariýa ykdysadyýet we ekologiýa hyzmatdaşlygyny güýçlendirmekçi.
33Şweýsariýanyň Daşary gatnaşyklar federal kanselýariýasynda Türkmenistanyň adatdan daşary we doly ygtyýarly ilçisi Wepa Hajyýew bilen Döwlet sekretarynyň ýörite geňeşçisi Anzej Zobristiň arasynda duşuşyk geçirildi. Duşuşygyň dowamynda iki ýurduň arasyndaky ikitaraplaýyn hyzmatdaşlygyň esasy taraplary, mundan beýläk-de ösdürmegiň geljegi ara alnyp maslahatlaşyldy.
Duşuşyga gatnaşyjylar Türkmenistan bilen Şweýsariýanyň arasyndaky ikitaraplaýyn gatnaşyklaryň häzirki ýagdaýyna aýratyn üns berdiler. Syýasy gatnaşyklar, hyzmatdaşlygyň hukuk binýadyny gowulandyrmak, şeýle hem köptaraplaýyn platformalarda hyzmatdaşlyk meselesi ara alnyp maslahatlaşyldy.
Ykdysady hyzmatdaşlygy pugtalandyrmaga aýratyn üns berildi. Taraplar söwda gatnaşyklaryny we maýa goýum hyzmatdaşlygyny ösdürmäge gönükdirilen bilelikdäki taslamalary durmuşa geçirmegiň geljegini ara alyp maslahatlaşdylar.
Mundan başga-da, durnukly suw dolandyryşyny ösdürmegi maksat edinýän Mawy Parahatçylyk inisiatiwasynyň çäginde birnäçe daşky gurşaw meselesi ara alyp maslahatlaşyldy. Duşuşyga gatnaşyjylar bu mesele boýunça hyzmatdaşlygy çuňlaşdyrmaga taýýardyklaryny mälim etdiler we iki ýurt üçin durnukly ösüşiň ähmiýetini bellediler.
Duşuşygyň ahyrynda taraplar konstruktiw gepleşikleri dowam etdirmek we möhüm ugurlarda hyzmatdaşlygy giňeltmäge gönükdirilen bilelikdäki başlangyçlary durmuşa geçirmek barada ylalaşdylar.
switzerland.tmembassy.gov.tm
