Täzelikler

«Pähim-paýhas ummany Magtymguly Pyragy» ýylynda ähli ugurlar bilen birlikde türkmen tebigatynyñ täsinlikleri, ösümlik we haýwanat dünýäsiniñ seýrek görnüşleri, bu ugurda alnyp barylýan işler baradaky maglumatlar bilen halk köpçüligini giñden tanyşdyrmak maksady bilen, «Türkmenistan» gazetiniñ redaksiýasy Türkmenistanyñ Daşky gurşawy goramak ministrligi bilen bilelikde žurnalistleriñ, hünärmenleriñ, fotosuratçylaryñ we ähli gyzyklanma bildirýänleriñ arasynda «Türkmen tebigaty —ylham çeşmesi» atly döredijilik bäsleşigini yglan edýär.

Bäsleşige döredijilik bilen meşgullanýan islendik ýaşdaky raýatlar we foto suratçylar gatnaşyp bilerler. Hödürlenilýän işler many-mazmuna, takyk maglumatlara baý bolup, olarda türkmen tebigatynyñ ajaýyp künjekleriniñ ýylyñ dürli möwsümlerine mahsus owadan keşbi, ösümlik we haýwanat dünýäsiniñ aýratynlyklary, şeýle-de heniz mälim bolmadyk ýa-da doly öwrenilmedik täsinlikleri beýan edilmelidir. Bäsleşige hödürlenilýän eserler makala, oçerk, ýol ýazgylary, zarisowka ýaly dürli žanrlarda, suratlar bolsa fotoreportaž görnüşinde bolmalydyr. Hödürlenilýän işler, fotosuratçylaryñ suratlary gazet-žurnallarda ozal çap edilmedik bolmalydyr.

Bäsleşige hödürlenilýän işler elektron nusgada «Türkmenistan» gazetiniñ redaksiýasyna (Aşgabat şäheri, Garaşsyzlyk şaýoly, 100, Türkmenbaşynyñ erkin döredijilik mekany) ýa-da elektron poçtasyna (turkmenistan-gazeti@sanly.tm) «Türkmen tebigaty — ylham çeşmesi» atly bäsleşigine» diýen ýazgy bilen ugradylmalydyr. Olaryñ arasyndan iñ gowulary saýlanyp-seçilip, gazetde çap ediler.

Bäsleşige gatnaşmaga isleg bildirýänler redaksiýa ugradýan işlerine özleri baradaky maglumatlary (işleýän ýa-da ýaşaýan ýeriniñ salgysy, telefon belgisi) hem goşmalydyrlar.

Bäsleşik bildiriş gazetde çap edilen gününden başlap, 2024-nji ýylyñ 1-nji dekabryna çenli dowam eder hem-de dekabr aýynyñ içinde jemleniler. Ýeñijilere Türkmenistanyñ Daşky gurşawy goramak ministrliginiñ diplomlary we ýadygärlik sowgatlary gowşurylar.