Ýurdumyzyň aýratyn goralýan tebigy ýerlerinde «SMART» ulgamyny ornaşdyrmak boýunça teklipler ara alyp maslahatlaşyldy
32 Türkmenistanyň Daşky gurşawy goramak ministrliginiň Gidrometeorologiýa baradaky gullugynyň edara binasynda SMART ulgamyny, onuň ýörelgelerini we gözegçilik usullaryny aýratyn goralýan tebigy ýerleriniň işine ornaşdyrmak boýunça tegelek stoluň başynda söhbetdeşlik geçirildi.
Bu çäre Germaniýanyň hökümetiniň adyndan halkara hyzmatdaşlyk boýunça jemgyýeti (GIZ) tarapyndan amala aşyrylýan "Merkezi Aziýada howanyň üýtgemeginiň hasaba alynmagy bilen ýer serişdelerini integrirlenen peýdalanmak boýunça sebitleýin maksatnamasy” (ILUCA) we Türkmenistandaky Conservation XLabs maksatnamasy bilen hyzmatdaşlykda guraldy.
Tegelek stoluň esasy maksady ILUCA maksatnamasy bilen hyzmatdaşlykda aýratyn goralýan tebigy ýerleriň işinde SMART ulgamyny, onuň ýörelgelerini we usullaryny ulanmak boýunça teklipleri we ony giňişleýin ornaşdyrmagyň meýilnamasyny işläp düzmek işleriniň netijelerini jemlemekden ybarat boldy.
Çärä Türkmenistanyň Daşky gurşawy goramak ministrliginiň wekilleri, milli bilermenler we beýleki gyzyklanýan taraplar gatnaşdylar. Gatnaşyjylara SMART ulgamy, onuň ýörelgeleri we usullary barada, onuň ministrligiň garamagyndaky aýratyn goralýan tebigy ýerleriň gündelik işinde synagdan geçirmegiň netijeleri, şeýle hem SMART ulgamyny, onuň ýörelgelerini we usullaryny ähli aýratyn goralýan tebigy ýerleriň işine giňden ornaşdyrmak boýunça teklipler ara alnyp maslahatlaşyldy.
SMART ulgamyny, onuň ýörelgelerini we usullaryny aýratyn goralýan tebigy ýerleriň işine ornaşdyrmagyň öňki synag başlangyçlaryna we okuw maslahatlaryna daýanyp, häzirki tapgyrda alnyp barylýan işler SMART ulgamyny aýratyn goralýan tebigy ýerleriň işine giňden ornaşdyrmagy aňladýar. Çäräniň dowamynda oňa gatnaşyjylara SMART ulgamynyň kömegi bilen maglumatlary ýygnamak, meýdan şertlerinde haýwanlary we ösümlikleri, şol sanda Türkmenistanyň Gyzyl kitabyna girizilenleri we ýok bolmak howpy astynda duranlary hasaba almak, bikanun aw awlamaga garşy göreşmek, biodürliligi gorap saklamak boýunça maglumatlary jemlemek, umumylaşdyrmak we ministrligiň sanly ulgamynyň binýadyna geçirmekde SMART ulgamynyň aýratynlyklary barada gürrüň berildi.
SMART ulgamyny, onuň ýörelgelerini we usullaryny aýratyn goralýan tebigy ýerleriň işine ornaşdyrmagyň hukuk esaslary baradaky teklipler we bu ugurda taýýarlanan resminamalaryň taslamalaryny ara alyp maslahatlaşmak tegelek stola gatnaşyjylarda örän içgin gyzyklanma döretdi.
Tegelek stola gatnaşyjylar SMART ulgamyny aýratyn goralýan tebigy ýerleriň işine ornaşdyrmagyň netijesinde toplanýan maglumatlary jemlemegiň, olary umumylaşdyrmagyň, deňeşdirmegiň usullary, şeýle hem toplanan maglumatlaryň goraglylygynyň üpjün edilmegi barada pikir alyşdylar we SMART ulgamyny ösdürmek üçin geljekki ugurlary kesgitlediler.
Tegelek stola gatnaşyjylar SMART ulgamynyň ornaşdyrylmagyny biodürlüligiň gözegçiligini gowulandyrmak, daşky gurşawy goramak işleriniň netijeliligini ýokarlandyrmak we Türkmenistanyň aýratyn goralýan tebigy ýerleriniň dolandyryş mümkinçiliklerini güýçlendirmek üçin ädimleriň biri hökmünde kesgitlediler.
